IPKO organizoi Konferencën e 2-të për Sigurinë Kibernetike, duke mbledhur një numër të konsiderueshëm pjesëmarrësish nga bizneset, institucionet qeveritare, sektori financiar, akademia dhe partnerë ndërkombëtarë të teknologjisë. Konferenca shërbeu si platformë strategjike për adresimin e rreziqeve aktuale të sigurisë kibernetike dhe për ndarjen e përvojave praktike në mbrojtjen e infrastrukturës digjitale dhe sistemeve kritike.
Programi i konferencës përfshiu prezantime tematike, diskutime të strukturuara në panel dhe raste konkrete nga industria, duke ofruar një qasje gjithëpërfshirëse ndaj sigurisë kibernetike nga perspektiva teknike, operative dhe institucionale. Fokus i veçantë iu kushtua sigurisë së infrastrukturës kritike, rrjeteve të telekomunikacionit, menaxhimit të rreziqeve digjitale dhe përputhshmërisë me standardet ndërkombëtare.
Prezantimet trajtuan rëndësinë e ndërtimit të kapaciteteve të qëndrueshme për mbrojtjen e sistemeve digjitale, rritjen e rezistencës ndaj incidenteve kibernetike dhe rolin e bashkëpunimit ndërinstitucional dhe ndërkombëtar në përballjen me kërcënimet në rritje.
Një pjesë e rëndësishme e konferencës iu dedikua qëndrueshmërisë digjitale dhe mbrojtjes së infrastrukturës kritike. Në këtë kuadër, Dr. Albulena Xhelili Berisha, Drejtoreshë e Programit për Digitalizimin dhe Qëndrueshmërinë e Infrastrukturës Kritike (CIDR), financuar nga USAID, prezantoi rolin e sigurisë kibernetike në forcimin e institucioneve dhe sistemeve kritike në Kosovë.
Konferenca solli gjithashtu përvoja konkrete nga sektori i telekomunikacionit dhe teknologjisë. Faton Kurteshi, Udhëheqës i Departamentit Teknik në IPKO, prezantoi zhvillimet infrastrukturore dhe qasjen strategjike të kompanisë në integrimin e sigurisë kibernetike në shërbimet e telekomunikacionit.
Nga perspektiva rajonale dhe ndërkombëtare, Metod Platiše dhe Matjaž Katarinčič nga Telekom Slovenije ndanë përvoja mbi sigurinë e transaksioneve digjitale, analizën forensike, mbrojtjen e rrjeteve dhe identifikimin elektronik. Ndërkohë, Hrvoje Marinović nga Ericsson prezantoi qasje të avancuara mbi arkitekturën e rrjeteve të telekomunikacionit dhe aspektet e sigurisë në rrjete komplekse.
Kontribut të rëndësishëm dhanë edhe partnerët ndërkombëtarë të sigurisë kibernetike. Paul Palmer nga Bitdefender foli për mbrojtjen ndaj kërcënimeve moderne dhe rëndësinë e zgjidhjeve të avancuara të sigurisë, ndërsa Nir Sherwinter nga CyberArk u fokusua në menaxhimin e identiteteve, përputhshmërinë rregullatore dhe mbrojtjen e sistemeve kritike në mjedise cloud dhe hibride.
Një nga pikat qendrore të konferencës ishte diskutimi në panel mbi rolin strategjik të sigurisë kibernetike dhe nevojën për bashkëpunim ndërsektorial në përballjen me rreziqet digjitale.
Paneli mblodhi përfaqësues nga sektori publik, financiar dhe privat, përfshirë:
- Artan Dreshaj – Drejtor i Departamentit për Siguri Kibernetike dhe Administrim të Sistemeve
- Blerim Tahiraj – Team Manager ICT & Solutions, IPKO
- Vesna Prodnik – Anëtare e Bordit të Menaxhimit
- András Pali – Drejtor Ekzekutiv, IPKO
- Edmond Shyti – Project Manager Cybersecurity, USAID
- Arbnor Ymeri – Ekspert i Sigurisë Kibernetike, ProCredit Bank
Diskutimi ofroi perspektiva konkrete mbi sfidat aktuale, investimet në siguri dhe rëndësinë e ndërtimit të një ekosistemi digjital të qëndrueshëm dhe të sigurt.
Konferenca u mbështet nga partnerë ndërkombëtarë lider në fushën e sigurisë kibernetike dhe telekomunikacionit, përfshirë Telekom Slovenije, Ericsson, Bitdefender dhe CyberArk, të cilët prezantuan zgjidhje inovative dhe praktika të avancuara për mbrojtjen ndaj kërcënimeve digjitale.
Me këtë edicion, IPKO forcoi më tej rolin e saj si një aktor kyç në promovimin e sigurisë kibernetike në Kosovë, duke kontribuar në rritjen e vetëdijes, ndarjen e njohurive dhe ndërtimin e kapaciteteve për mbrojtjen e infrastrukturës digjitale dhe zhvillimin e qëndrueshëm ekonomik.
