IPKO organizoi Konferencën e 3-të për Sigurinë Kibernetike, edicionin më të madh dhe më gjithëpërfshirës deri më tani, duke mbledhur mbi 450 pjesëmarrës nga bizneset, institucionet qeveritare, sektori financiar, akademia dhe organizatat ndërkombëtare. Konferenca u zhvillua si një platformë strategjike për adresimin e sfidave aktuale të sigurisë kibernetike dhe për ndarjen e përvojave konkrete në mbrojtjen e infrastrukturës digjitale në një mjedis gjithnjë e më kompleks teknologjik.
Programi i konferencës përfshiu prezantime strategjike, diskutime të strukturuara në panel, studime të rasteve reale dhe një Ekspozitë të Sigurisë Kibernetike, duke ofruar një qasje gjithëpërfshirëse nga perspektiva teknike, operative dhe financiare e sigurisë digjitale.
Prezantimet u fokusuan në qëndrimin një hap përpara kërcënimeve kibernetike, shndërrimin e inteligjencës së sigurisë në veprime konkrete dhe ndërtimin e kapaciteteve të qëndrueshme për mbrojtjen e sistemeve kritike.
Një vëmendje e veçantë iu kushtua menaxhimit të kërcënimeve kibernetike, rritjes së dukshmërisë së rreziqeve në rrjetet moderne dhe qasjeve të avancuara për mbrojtjen e rrjeteve celulare dhe IoT, përfshirë monitorimin e vazhdueshëm, përputhshmërinë rregullatore (compliance) dhe reagimin ndaj incidenteve. Këto tema u trajtuan përmes prezantimeve teknike dhe shembujve praktikë nga partnerë ndërkombëtarë të teknologjisë.
Një nga pikat qendrore të konferencës ishte diskutimi në panel “Ndikimi financiar – Siguria kibernetike: Investim apo shpenzim i pashmangshëm?”, ku u analizua roli i sigurisë kibernetike si prioritet strategjik për organizatat dhe institucionet.
Diskutimi u pasurua edhe nga kontributi i ekspertëve ndërkombëtarë të sigurisë kibernetike, të cilët sollën perspektiva praktike dhe përvoja konkrete nga industria globale.
Marko Ostanek, profesionist me mbi 20 vjet përvojë në fushën e sigurisë kibernetike dhe aktualisht SE Manager për rajonin Adriatik në Check Point, ndau praktika të avancuara mbi arkitekturën Zero Trust, mbrojtjen e qendrave të të dhënave dhe sigurinë e mjediseve hibride dhe multi-cloud.
Po ashtu, Noam Segev, Chief Revenue Officer në Shield-IoT / Mastercard, theksoi rëndësinë e sigurisë së rrjeteve celulare IoT dhe menaxhimit të kërcënimeve për pajisjet e lidhura me SIM, duke u fokusuar në përputhshmërinë rregullatore dhe shkallëzimin e sigurt të shërbimeve digjitale.
Ndërkohë, Metod Platiše, Menaxher i Produkteve në Qendrën e Sigurisë Kibernetike të Telekom Slovenije, prezantoi përvoja konkrete në identifikimin elektronik, sigurinë e transaksioneve digjitale dhe ndërtimin e infrastrukturave të sigurta të komunikimit.
Ndërsa paneli mblodhi vendimmarrës dhe ekspertë nga sektorë kyç, përfshirë:
- András Pali, Drejtor Ekzekutiv i IPKO-s,
- Ejup Maqedonci, Ministër i Mbrojtjes së Republikës së Kosovës (në detyrë),
- Blerim Rexha, profesor në Universitetin e Prishtinës (FIEK) dhe ekspert i sigurisë kibernetike,
- Elvin Mala, udhëheqës i Divizionit për Mbikëqyrjen e Sistemeve të TI-së dhe Sigurisë Kibernetike në Bankën Qendrore të Kosovës, si dhe
- Vlad Gurmans, Zëvendëspresident në Whalebone.
Paneli u moderua nga Valon Canhasi, duke mundësuar një diskutim të balancuar dhe të thelluar mbi ndikimin ekonomik, institucional dhe strategjik të investimeve në sigurinë digjitale.
Konferenca u pasurua më tej nga kontributi i kompanive dhe partnerëve ndërkombëtarë lider në fushën e sigurisë kibernetike, përfshirë Telekom Slovenije, Check Point, Whalebone dhe Shiel-IoT / Mastercard, të cilët prezantuan zgjidhje inovative dhe praktika të avancuara për mbrojtjen ndaj kërcënimeve moderne. Paralelisht, sesionet e ekspozitës dhe networking-ut krijuan hapësira konkrete për shkëmbim përvoje, ndërtim partneritetesh dhe bashkëpunim profesional.
Me këtë edicion, IPKO e forcoi më tej pozicionin e saj si një autoritet i besueshëm në fushën e sigurisë digjitale, duke kontribuar në rritjen e vetëdijes, besimit dhe kapaciteteve përballë rreziqeve kibernetike, si dhe duke e pozicionuar sigurinë kibernetike si një shtyllë kyçe të zhvillimit digjital dhe ekonomik të Kosovës.
